Алтынньы 14 күнэ. Сахаларга ХIХ үйэ ортотуттан православнай итэҕэли ылыннарыахтарыттан Бокуруоп таҥаратын күнүн, ол эбэтэр кыстыгы туорууур отторун-мастарын, астарын-үөллэрин ааҕынар бириэмэлэрин бу күҥҥэ түбэһиннэрэн бэлиэтиир буолан барбыттара. 220 хонуктаах, аам-даам тымныылаах кырыа кыһыны бэлэмнээх, сөпкө ааҕынан, суоттанан кыстыкка киирдэхпитинэ табыллар. Бокуруоптан кыһыҥҥы күн ааҕыллар, кыра, эрдэ тоҥмут уулаах күөллэргэ муҥха саҕаланар, эмис собо, өрүс балыктарын миинин иһиэбит. Булчуттар тыаҕа тахсаары саамай тэринэр кэмнэрэ, аттарын тутуу, сыарҕаларын, сааларын-сэптэрин көрүнүү, астарын-таҥастарын бэрийии. Ол түбүк барыта Бокуруобу кытта ыкса сибээстээх буоллаҕа. Өбүгэлэрбит эппиттэринии «Күһүҥҥү киһи күлбүтүнэн» диэн, саха өс хоһоонун олус табатык суруйбуттар эбит диэн өйдүү түһэҕин.
11.30 чаастан хас эмэ үйэлэргэ Амма эбэбит аһатан-сиэтэн, күндүлээн кэлбитин бэлиэтээн, киниэхэ сүгүрүйэрбитин, махтанарбытын, көрдөһөрбүтүн биллэрэн алгысчыт Данил Егорович кыһыны көрсүү сиэрин-туомун ыытта.
12 чаастан Өксөкүлээх Өлөксөй төрөөбүт балаҕанын куопуйатыгар алгысчыт Владимир Иннокентьевич өйбүтүнэн-санаабытынан саҥалыы сайдыы суолларын тутуһан, бу кыһыны үлэ үрдүгэр сылдьан, сүһүөхпүтүгэр чиҥник үктэнэн аны саас үрдүк ситиһиилээх, көрдөрүүлээх тиийэрбитин аал уоту оттон, аһатан-сиэтэн уот иччититтэн көрдөһөн, үтүө тыллары бар дьоммутугар анаата.
Ол кэннэ Бокуруоп таҥаратын күнүнэн, таҥара дьиэтигэр звонарь Егор Романович куолакалын тыаһатта. Аммабыт сирин дойдутун арчылыыр дьикти дорҕоону тыас таһааран бар дьонугар кэрэни түстээтэ.
Күнүһүн анаабыт курдук бэлиэ күҥҥэ түбэһиннэрэн кыстыгы туоруур уматыкпыт (бензин, дизель) кэллэ. Нэһилиэкпит эр дьонугар уматыгы сүөккүүргэ көмөлөспүттэригэр дириҥ махталбытын биллэрэбит.
Быйыл Таатта улууһун тыа хаһаайыстыбатын управленията уонна Амма нэһилиэгин администрациятын үбүлээһининэн (188951,9 руб. + 50000 доставката) тыа хаһаайыстыбатын сайдыытыгар анал программанан 77 куул корма ,118 куул эбиэс 32 ыалга тунэтиллиннэ
Киэһэ 5 чаастан нэһилиэк эдэр ийэлэрин кытта «Айылгы» норуот айымньытын дьиэтигэр сэргэх кэпсэтии, баҕа санаалары этинии, былааннаныы, көрдөөх оонньуулар Варвара Владимировна — Чэмэлиинэ көҕүлээһининэн ыытылынна.
Бу күҥҥэ тэрээһиннэри оҥорууга кыттыспыт дьоммутугар-сэргэбитигэр Бокуруоп күнүн бэлиэтииргэ ыйааччы — кэрдээччи, кэпсэтээччи Клавдия Николаевнаҕа, саламаат оҥорооччуга Валентина Михайловнаҕа, Харитина Михайловнаҕа, алаадьыны астааччыларга Раиса Ефимовнаҕа, Анна Даниловнаҕа, Матрена Константиновнаҕа, Клавдия Николаевнаҕа, быырпаҕы бэлэмнээбит Мария Пантелеймоновнаҕа, «Алаас хотуттара» түмсүү кыттыылаахтарыгар махталбыт муҥура суох.