Сэтинньи 4 күнүгэр, Арассыыйаҕа сомоҕолоһуу күнүн чэрчитинэн «Ким доҕордоох — ол дьоллоох» диэн бэрт сэргэх тэрээһин буолан ааста.
Күнүс 2 чаастан «Кэрэҕэ кынаттыыр Кэнчээри» Арассыыйа норуотун айымньытын үтүөлээх кэллэктиибэ 50 сыллаах юбилейнэй кэнсиэрин улахан экраҥҥа көрдөрүүттэн ситимнэнэн саҕаланна. Бары билэрбит курдук күргүөмунэн ырыаны толоруу, ансаамбылынан үҥкүүлээһин дойду, норуот, уопсастыба биир сомоҕо буоларыгар саамай тутаах үнустүрүмүөнэ. Хорунан толоруу аан дойду үрдүнэн ускуустуба үрдүкү чыпчаалынан биллэр. Дэлэҕэ аҕа дойду улуу сэриитэ саҕаланыытыгар И.В. Сталин этиитинэн бүттүүн Сэбиэскэй сойуус үрдүнэн республикаларга, уокуруктарга радио хорун тэрийиитэ, Улуу Москуба куоракка, дойду тэбэр сурэҕэр аар саарга аатырбыт «Ансамбль песни и пляски Российской армии им. А.В Александрова» уонна «Государственный академический ансамбль народного танца имени Игоря Моисеева» тэрийиитэ буолар. А. Александров хоругар анаан 1941 сылга 3 күн иһигэр «Вставай страна огромнайа» ырыа муусукатын суруйа охсон, онтукатын бүттүүн Сойуус радиоларыгар ыллатан, оччотооҕу былаас норуотун биир санааҕа түмпүтэ.
Кунус 3.30 чаастан Өксөкүлээх Өлөксөй аатынан норуот айымньытын дьиэтэ, А.П. Кулаковская аатынан модельнай библиотека, «Дьулуур» спортсаалата, «Айар алаһа» нэһилиэк бэтэрээннэрин сэбиэтэ«АРААС ОМУК МААНЫЛААХ САНДАЛЫТА»(Якутская кухня, Корейская кухня, Восточная кухня) тэрийэн, кэлбит ыалдьыттары минньигэс аһынан күндүлээтилэр. Тэрийээччилэр, кыттааччылар, ыалдьыттар бары сирэйдиин – харахтыын сырдаан, холкутуйан итии чэй тула доҕоттордуун — атастардыын алтыһыыта тэрээһин үтүө түгэнинэн буолла.
Күнүс 4 чаастан АММА нэһилиэгин активистара кыттыылаах бырааһынньыктааҕы «КИМ ДОҔОРДООХ — ОЛ ДЬОЛЛООХ» кэнсиэрэ өрө көтөҕүллүүлээхтик арылынна. Ульяна Табунанова салайааччылаах «Кэрэхсэл» үҥкүү бөлөҕө «корейскай” уонна “хомус” үҥкүүлэрин, имигэс хамнаныыларынан, мимикаларынан, үҥкүү туруоруутунан толорутук көрөөччүгэ тиэрпиттэрэ махталлаах. Норуоттар сомоҕолоһууларын күнүгэр Роберта Миронова толоруутугар «Узбекскай үҥкүү», Татьяна Табунанова толоруутугар «Казахскай үҥкүү» дьон биһирэбилин ылла.
Кэнсиэргэ ансаамбылынан уонна биирдиилээн ырыаны толорооччулар «Доҕордоһуу», «Киэн тутун», «Сахам сирэ», “Биһик ырыата”, «Көрүүй», «Комсомол» — «КИМ ДОҔОРДООХ — ОЛ ДЬОЛЛООХ» кэнсиэр тутулун толору арыйдылар.
Тэрээһин саамай сүрүн суолталаах хаамыытынан нэһилиэк ытыктыыр уонна киэн туттар биир дойдулаахпыт Алексей Николаев «СОМОҔОЛОҺУУ» Таатталыы оһуокайын оройуттан тутта, мустубут ыалдьыттар сүргэлэрэ көтөҕүллэн, «Уруй — Айхал» этиинэн Арассыыйаҕа сомоҕолоһуу күнэ биһи нэһилиэкпитигэр үөрүүлээхтик түмүктэннэ.
Егор Иванов, Өксөкүлээх Өлөксөй аатынан Чычымахтааҕы норуот айымньытын дьиэтин уус-уран, «Айар Кут» айар түмсүү салайааччыта.